لە چوارچێوەی هەماهەنگی و کاری زانستیی هاوبەشی نێوان زانکۆی گەرمیان و بەشی میراتی کەلەپوری زانکۆی بۆڵۆنیای ئیتاڵیا، خولێکی زانستیی نێودەوڵەتیی بە ناونیشانی (خوێندنەوە و زیندووکردنەوەی وێنە مێژووییەکان لە زانستی شوێنەوارناسیدا) لە ڕۆژانی (١٤ و ١٥ و ١٨ـی ئایاری ٢٠٢٥) بەڕێوەچوو.
وانەکانی خولەکە لەلایەن تیمێکی زانکۆی بۆڵۆنیا و زانکۆی تیورنی ئیتاڵیا ماوەی زیاتر لە ١٢ کاتژمێر بەشێوەی تیۆری و پراکتیکی پێشکەشکران، لە میانەی خولەکەدا چەند پلاتفۆرمێک کە سودی گەورەیان لە خوێندنەوە و زیندووکردنەوەی وێنە مێژوویی و شوێنەوارییەکان هەیە و ڕۆڵی گرنگ دەگێڕن لە باشترکردنی کوالێتی توێژینەوەکان بۆ بەشداربووانی خولەکە خرایەڕوو، لەوانە (سەرەتایەک بۆ CVAT، خوێندنەوەی دەرەنجامەکانی CSV و شیکاری دەرئەنجامەکانی YOLOV8).
لە کۆتاییشدا، لەلایەن (پرۆفیسۆری یاریدەدەر د.محەمەد ئیبراهیم خەلیل) یاریدەدەری سەرۆکی زانکۆ بۆ کاروباری زانستی و خوێندنی باڵا، ڕێزلێنان پێشکەش بە وانەبێژ و بەشداربووان کرا.